Tveir af vinsælustu tónlistarmönnum landsins, þeir Helgi Björns og Ingó veðurguð, verða í beinni útsendingu í sjónvarpi Símans og hér á mbl.is um verslunarmannahelgina. Beint streymi af tónleikunum verður að finna bæði kvöld hér á mbl.is og á K100, og hefst útsending rétt fyrir klukkan átta.

Helgi Björns verður með verslunarmannahelgar-útgáfu af Heima með Helga, sem hann byrjaði með í gegnum skemmtanabannið í vetur og vor. Eins og áður er það leyndarmál hverjir eru gestir Helga í þessari tveggja daga seríu en þátturinn verður í beinni útsendingu frá Hlégarði í Mosfellsbæ laugardags- og sunnudagskvöld milli 20:00 og 21:30.

Það eru sem fyrr Reiðmenn vindanna sem fylgja Helga í hlað og koma öskuglaðir heim. Þá verður álfadrottningin Vilborg Halldórsdóttir á sínum stað.

Klukkan 22:00 á sunnudagskvöldið, að loknum þættinum Heima með Helga, tekur Ingólfur Þórarinsson, eða Ingó veðurguð, boltann og telur í brekkusöng eins og hefð er fyrir á þessum tíma helgarinnar. Þó verður það nokkurn veginn það eina hefðbundna við brekkusönginn þetta árið því eins og alþjóð veit er þetta í annað skiptið í sögunni sem þjóðhátíð er frestað. 

Ingó á þjóðarhátíðarlagið í ár, „Takk fyrir mig“, sem á einhvern fallegan hátt er orðið einkennislag fyrir hátíð sem ekki verður haldin en um leið þakklætissöngur til allra hátíðanna í gegnum árin sem sköpuðu bæði gestum og heimamönnum einstakar minningar. Ingó mun senda brekkusönginn út af meginlandinu með tengingu við Vestmannaeyjar en útsendingin er unnin í samráði við þjóðhátíðarnefnd, sem með þessu sendir kveðjur sínar til landsmanna.

Tengdar fréttir

Helgi Björns

Helgi auglýsir á Tenerife: „Íslendinganýlenda“

• Helgi ætlar að toppa sig um helgina
• Helgi Björns í beinni um verslunarmannahelgina
• Helgi toppaði sig í ljósum jakkafötum og strigaskóm
• Bubbi tryllti salinn og áhorfendur

» Fleiri tengdar fréttir

• Blogga um frétt