Ástralska tónlistarkonan Helen Reddy er látin 78 ára að aldri. Reddy var mikill femínisti og er meðal annars konan á bakvið lagið I Am Woman.
Reddy lést í Los Angeles í Bandaríkjunum í gær, þriðjudag, að því er fram kemur í dánartilkynningu frá fjölskyldu hennar á Facebook. Börn hennar, Traci Donat og Jordan Sommers lýstu henni sem yndislegri móður, langömmu og sannarlega sterkri konu.
Reddy var greind með Addison sjúkdóminn og greindist með elliglöp árið 2015. Hún eyddi síðustu árum ævi sinnar á dvalarheimili fyrir stórstjörnur í Los Angeles.
Nokkur lög hennar á 8. áratug síðustu aldar slóu í gegn en best var hún þó þekkt fyrir lagið I Am Woman sem varð að baráttulagi kvenréttindafólks. Lagið seldist í milljónum eintaka um heim allan og var Reddy tekjuhæsta söngkonan í tvö ár í röð.