Harry og Meghan eiga von á öðru barni

Harry Bretaprins og Meghan Markle, eiginkona hans, eiga von á öðru barni. Talsmaður hjónanna staðfesti þetta nú fyrir skemmstu, en Guardian greinir frá.

Hjónin eiga fyrir einn son, Archie, en ekki liggur fyrir hvort Meghan gengur með strák eða stelpu. „Við getum staðfest að Archie verður bráðum stóri bróðir. Hertoginn og hertogaynjan af Sussex eru himinlifandi með að eiga von á öðru barni sínu.“

Meghan greindi frá því í nóvember að hún hefði misst fóstur síðasta sumar, en í grein sem hún skrifaði í New York Times lýsti hún áfallinu.

Frétt af mbl.is

Meghan greinir frá fósturláti

Tæpt ár er síðan Harry og Meghan sögðu upp störfum, svo að segja, hjá bresku konungsfjölskyldunni, í þrá eftir persónulegu og fjárhagslegu sjálfstæði. Þau búa nú í Montecito í Kaliforníu. 

Þrátt fyrir það er Harry enn prins og heldur sæti sínu í erfðaröðinni. Barnið sem Meghan gengur með verður við fæðingu áttunda í erfðaröð bresku krúnunnar, á eftir Karli afa sínum, Vilhjálmi föðurbróður, Georgi, Karlottu og Lúðvík, frændsystkinum sínum, Harry föður sínum og Archie stóra bróður.

• Blogga um frétt