Leikararnir Lily James og Sebastian Stan fara með hlutverk Pamelu Anderson og Tommys Lees í þáttaröðinni Pam & Tommy. Nýjar myndir frá tökum sýna að þau James og Stan eru nær óþekkjanleg í hlutverkum sínum.
Á mynd sem Stan deildi af sér á Instagram má sjá hann í gervi Tommys Lees. Hann er ber að ofan, í leðurbuxum og skreyttur húðflúrum. Hann birti einnig svarthvíta mynd af sér og James í hlutverkum hjónanna.
Þættirnir sem eru framleiddir af efnisveitunni Hulu fjalla um stormasamt samband leikkonunnar Pamelu Anderson og rokkarans Tommys Lees að því er fram kemur á vef ET. Hjónin fyrrverandi gengu í hjónaband á strönd í Mexíkó árið 1995 eftir að hafa þekkst aðeins í 96 tíma. Kynlífsmyndband úr brúðkaupsferðinni fór í dreifingu árið 1995.