Dr. Gunni og Eiríkur Hauksson í eina sæng

Tónlistarmennirnir Dr. Gunni og Eiríkur Hauksson sendu frá sér lagið Engin mistök í dag. Lagið er fyrsta lagið af væntanlegri plötu Dr. Gunna, Nei, ókei, sem kemur út í haust.

Lagið segir frá manni sem er sífellt í leit að „besta kvöldi lífs síns“ og er staðráðinn í að gera „engin mistök“. Lagið er óður til þeirra óteljandi sem halda áfram að leita hinnar úfórísku alsælu hins fullkomna djamms.

Bakradda-tríó er leitt af Kristjönu Stefánsdóttur en auk hennar syngja þær Rakel Sigurðardóttir og Guðrún Ásta Tryggvadóttir. Árni Hjörvar sá um upptökur og hljóðblöndun.

Nei, ókei verður 12 laga LP-plata, sú fyrsta með hljómsveitinni Dr. Gunni síðan prjál-útgáfan „Í sjoppu“ kom út 2015, og fyrsta alvöru platan síðan „Stóri hvellur“ kom út 2003. Auk Gunnars Hjálmarssonar skipa Guðmundur Birgir Halldórsson, Grímur Atlason og Kristján Freyr Halldórsson sveitina.

• Blogga um frétt