Adele með nýjum manni á körfuboltaleik

Breska söngkonan Adele mætti ásamt einum stærsta umboðsmanni körfuboltaheimsins Rich Paul á fimmta leikinn í úrslitaviðureign NBA-körfuboltans. Adele lifði sig vel inn í leikinn og hvatti heimamenn í Phoenix Suns áfram en það dugði skammt því Milwaukee Bucks unnu leikinn. Samkvæmt heimildum Brian Windhorst er talið að þau séu nýtt par.

Fyrr á dögunum birti Adele mynd af sér á Instagram í enska landsliðsbúningnum fyrir úrslitaleik Englands og Ítalíu en sá leikur endaði með sigri Ítala eftir vítaspyrnukeppni. En það virðist hins vegar ganga vel í ástamálum Adele.

Adele hefur verið á milli tannanna á fólki upp á síðkastið en því hefur verið slegið upp að það væri meira en góð vinátta á milli hennar og breska rapparans Skepta. Hann var fjarri góðu gamni á þessum íþróttaviðburði. Nú var það Paul sem sat við hlið Adele. Þetta þykir tíðindum sæta því þetta er í fyrsta sinn sem þau sjást saman. Einnig var Lebron James á leiknum sem áhorfandi og Paul valdi frekar að sitja við hlið söngkonunnar. Windhorts fullyrti í það minnsta svo í hlaðvarpsþætti sínum The Hoop Collective strax að leik loknum.