Reis upp úr mannhafinu og flutti lög á Seyðisfirði

Það var vægast sagt mikið fjör á Seyðisfirði um helgina en þar fóru fram hinir árlegu lokatónleikar LungA eftir vikulanga listasmiðju í bænum og uppskeruhátíð.

Söngkonan Gugusar var fyrst á svið á föstudeginum og hélt uppi stemningunni með skemmtilegum danssporum. Við tók hljómsveitin Cyber og loks lokaði rapparinn Birnir kvöldinu.

Heljarinnar mannhaf myndaðist um sviðið þegar leið á kvöldið. Tókst rapparanum að rísa upp úr hafinu og upp á stein þar sem hann flutti nokkur lög áður en aftur var haldið á sviðið. Með honum var Brynjar Barkarson – Lil' Binni.

Á laugardeginum hóf hljómsveitin Skrattar fjörið og fylgdi sveitin russian.girls þeim á eftir. Við tók Bríet ásamt bandi. Svala lokaði síðan kvöldinu með Haffa Haff. Hlutu þau hvert uppklappið á fætur öðru og enduðu með að taka sitt fræga lag úr Söngvakeppninni 2008: The Wiggle Wiggle Song.

Í ár stóðu tónleikarnir yfir í tvo daga og voru þeir haldnir utandyra að nýju. Í fyrrasumar voru tónleikarnir með minna sniði en ella, sökum faraldursins. Auk lokatónleikanna teygði dagskrá hátíðarinnar sig lengra inn í vikuna og mátti til að mynda sjá tónlistaratriði á borð við JFRD, Snorra Ástráðs og B1B2 fyrir helgi.

Eins og sjá má á myndunum var gleðin við völd.