Hafa áhyggjur af þyngdartapi rapparans

Aðdáendur Post Malone þurfa ekki að hafa áhyggjur af nýlegu þyngdartapi rapparans. Hann segist vera heilbrigður og hamingjusamur, hvorki á fíkniefnum eða alvarlega veikur.

TMZ greinir frá og hefur eftir ónefndum vinum Post Malone að rapparinn hafi þyngst fyrir hlutverk í kvikmynd en síðan þá hafi hann farið á strangt mataræði, hreyft sig mikið og þar af leiðandi létts.

Þar að auki hefur hann verið á tónleikaferðalagi síðan í september og haldið um 90 mínútna tónleika í hvert sinn. Það hafi líka áhrif á þyngdartapið.

Aðdáendur Post Malone hafa haft áhyggjur af honum. AFP/Ina Fassbender

Pabbi hans, Rich Post, tjáði sig einnig um þyngdartapið á aðdáendasíðu sonar síns á Instagram þar sem hann skrifaði: „Ekki verið svona heilbrigður í mörg ár! Andlega og líkamlega.“

Áhyggjur aðdáenda kviknuðu eftir að myndband af honum á tónleikum í Sydney í Ástralíu fór á flug. Sögðu margir hann virka áberandi grennri en áður. „Ég hef áhyggjur að þú hafir létts svona mikið. Ég er ekki vanur því. Passaðu upp á heilsuna,“ skrifaði einn.

• Blogga um frétt