TikTok-stjarnan sem allir eru að missa sig yfir
Ef þú ert virkur notandi á samfélagsmiðlinum TikTok þá hefur nýjasta TikTok-stjarnan, Alix Earle, eflaust ekki farið framhjá þér. Vinsældir hennar hafa rokið upp og í síðasta mánuði fékk hún yfir 2 milljónir nýrra fylgjenda á miðlinum. En hver er Earle og af hverju virðast netverjar helteknir af henni?
Earle er 22 ára gömul og stundar nám við háskólann í Miami í Flórída. Hún er þekkt fyrir að gera myndskeið á TikTok þar sem hún deilir hár- og förðunarrútínu sinni með fylgjendum sínum auk þess sem hún deilir brotum úr lífi sínu.
Umræða um hversdagsleikann heillar aðdáendur
Lykillinn að velgengni Earle á miðlinum virðist felast í því að hún komi til dyranna eins og hún er klædd. Aðdáendur hennar kunna að meta hreinskilnina í myndskeiðum hennar, en þau myndskeið sem hafa notið hve mestar vinsældir eru svokölluð „Get Ready With Me“ myndskeið, eða „Gerðu þig til með mér.“
Slík myndskeið hlutu upphaflega vinsælda á Youtube stuttu eftir aldamótin 2000, en þau urðu góð leið fyrir efnishöfunda til að deila húð- og förðunarrútínum sínum með fylgjendum sínum og taka um leið umræðu um allt milli himins og jarðar, oft á persónulegri nótunum.
Earle deilir „Get Ready With Me“ myndskeiðum nær annan hvern dag á miðlinum, en myndskeiðin virðast þó að mestu ómerkileg, en það er líka einmitt málið. Í myndskeiðum sínum hefur Earle talað opinskátt um baráttu sína við bólur, þunglyndi, kvíða, vináttu og annan hversdagslegan veruleika þess að vera ung manneskja.
