Tónlistarkonan Lana Del Rey er orðin einhleyp á ný aðeins nokkrum mánuðum eftir trúlofun hennar og tónlistarmannsins Evan Winiker.
Rey staðfesti þetta í samtali við tímaritið Harper's Bazaar á dögunum. Hún segir Winiker hafa átt í vandræðum með sjálfan sig sem hafi á endanum leitt til sambandsslita þeirra.
Rey og Winiker héldu sambandi sínu fjarri sviðsljósinu, en í mars síðastliðnum fór orðrómur á flug um að þau hefðu trúlofað sig eftir að Rey sást með gríðarstóran demantshring á Billboard-verðlaunahátíðinni. Þá var talið að þau hefðu aðeins verið saman í nokkra mánuði.
Fyrir samband hennar við Winiker voru Rey og tónlistarmaðurinn Jack Donaghue að stinga saman nefjum. Fyrir það var hún orðuð við forsprakka Salem í nokkra mánuði og þar áður við kántrísöngvarann Clayton Johnson.
Rey og Johnson voru sögð hafa trúlofað sig árið 2020, en þau hættu saman eftir nokkra mánuði.