Skoski lögfræðingurinn Fiona Harvey, sem segir karakter eltihrellisins Mörthu úr Netflix-þáttunum Baby Reindeer byggja á sér, mun veita fjölmiðlamanninum Piers Morgan sitt fyrsta sjónvarpsviðtal.
Þátturinn verður sýndur í dag í Piers Uncensored. Morgan birti mynd af sér ásamt Harvey í myndveri þáttarins á X-reikningi sínum.
Netflix-þættirnir eru sannsögulegir og byggja á reynslu höfundarins og aðalleikarans Richard Gadd af kvenkyns eltihrelli. Gadd kvaðst hafa breytt ýmsu í fari eltihrellisins til að áhorfendur myndu ekki þekkja Harvey í þáttunum.
Virðist Gadd þó hafa vanmetið mátt og þrautseigju netverja, en þeir voru ekki lengi að leita Harvey uppi og hefur hún tjáð fréttamiðlum að henni hafi borist svívirðingar og líflátshótanir í kjölfarið.
Hefur Gadd nú biðlað til áhorfenda að leita hvorki eltihrellinn né aðrar persónur í þáttunum uppi.
Harvey hefur áður veitt viðtöl, en þó aldrei í sjónvarpi. Veitti hún meðal annars Daily Mail viðtal, en miðillinn ákvað að nafngreina hana ekki á sínum tíma.
Harvey íhugar að leita réttar síns þar sem hún telur Gadd ekki hafa breytt líkindum hennar nóg í gerð karaktersins Mörthu.
Til að mynda sé Martha, sem er leikin af Jessicu Gunning, einnig skosk, lögfræðimenntuð, tuttugu árum eldri en Gadd og á sér sögu að baki sem eltihrellir.
*WORLD EXCLUSIVE*
— Piers Morgan (@piersmorgan) May 8, 2024
The real-life Martha from Baby Reindeer breaks cover and gives me her first TV interview about the smash hit Netflix show.
Fiona Harvey wants to have her say & ‘set the record straight.’
Is she a psycho stalker?
Find out tomorrow on @PiersUncensored pic.twitter.com/MxaE5SEiTa