Úrslitaþáttur The Voice Ísland hefst kl 20:00 í kvöld í Sjónvarpi Símans. Fjöldi keppenda reyndi fyrir sér í þáttunum en nú standa aðeins fjórir eftir, einn úr liði hvers þjálfara.
Söngvararnir sem berjast um titilinn eru þau Þórdís Imsland úr liði Svölu Björgvins, Arnar Dór Hannesson úr liði Helga Björns, Karitas Harpa Davíðsdóttir úr liði Sölku Sólar og Sigurjón Örn Böðvarsson úr liði Unnsteins Manúels.
Þátturinn verður sannkölluð tónlistarveisla og það verða ekki bara þátttakendurnir sem hefja raust sína á Voice sviðinu. Hjörtur Traustason, sem bar sigur úr býtum í fyrstu þáttaröð The Voice Ísland stígur á svið og tekur lagið, auk þjálfaranna sem taka saman lagið tvö og tvö.