AGS vill að ESB fái meiri völd

Aðildarríki Evrópusambandsins þurfa að framselja meira af fullveldi sínu til sambandsins en þau hafa þegar gert að mati Alþjóðagjaldeyrissjóðsins (AGS) í því augnamiði að forðast frekari efnahagskrísur í framtíðinni. Þetta kom fram í ræðu sem framkvæmdastjóri AGS, Dominique Strauss-Kahn, flutti í Frankfurt. Frá þessu er greint á vef breska dagblaðsins Daily Telegraph í dag.

„Hjól samvinnunnar hreyfast of hægt. Miðstjórnin verður taka frumkvæðið á öllum sviðum sem skipta máli við að uppfylla sameiginleg örlög sambandsins, einkum í viðskiptalegri, efnahagslegri og félagslegri stefnumótun. Ríki verða að vera reiðubúin að framselja meira vald til miðstjórnarinnar,“ sagði Strauss-Kahn.

Lagði hann áherslu á að ESB færði ábyrgðina á aga í efnahagsmálum og endurbætur á stjórnsýslu innan sambandsins til sérstakrar stofnunar sem væri sjálfstæð gagnvart áhrifum aðildarríkjanna.

• 2 blogg um fréttina

Bloggað um fréttina

• Sigurður Haraldsson: Við þurfum ekki að ræða það!
• Haraldur Haraldsson: AGS vill að ESB fái meiri völd/þrætið svo EBS sinnar …