Saksóknarar í Madríd hafa farið fram á fangelsisvist yfir átta fyrrverandi ráðherrum héraðsstjórnarinnar í Katalóníu á meðan frekari rannsókn stendur yfir á þeirri atburðarás sem hefur átt sér stað síðastliðinn mánuð frá því að þjóðaratkvæðagreiðsla um sjálfstæði Katalóníu frá Spáni fór fram.
Níu af fjórtán fyrrverandi meðlimum héraðsstjórnar Katalóníu mættu fyrir dómstól á Spáni í morgun þar sem til stóð að vitnaleiðslur færu fram. Leiðtogi Katalóníu, Carles Puigdemont, er ekki þar á meðal.
Frétt mbl.is: Puigdemont mætti ekki fyrir dómara
Saksóknarar fara fram á að níundi ráðherrann verði látinn laus en þurfi að greiða tryggingu.
Réttarhöldunum hefur verið frestað til 9. nóvember, að því er fram kemur í tilkynningu frá Hæstarétti Spánar. Þá munu þeir ráðherrar sem mæta fyrir dóm þurfa að svara til saka fyrir ákæru um uppreisn, uppreisnaráróður og trúnaðarbrot og geta þeir átt yfir höfði sér 15-20 ára dóm, hver um sig.
Yfirvöld á Spáni geta gefið út alþjóðlega handtökuskipun á hendur Puidgemont og þeim fjórum ráðherrum sem mættu ekki fyrir dóm í morgun.