Kenndi stúlkunni um nauðgunina

Prestur á Ítalíu hefur verið harðlega gagnrýndur í dag eftir að hann notaði samfélagsmiðilinn Facebook til þess að senda þau skilaboð til stúlku sem var nauðgað að hún gæti sjálfri sér um kennt fyrir að verða drukkin og umgangast innflytjendur.

„Mér þykir það leitt en ef þú syndir í fiskabúri fullu af pírenafiskum geturðu ekki kvartað yfir því ef þú missir útlim,“ skrifaði Lorenzo Guidotti, sóknarprestur í borginni Bologna, á Facebook-síðu stúlkunnar. Stúlkan, sem er undir lögaldri, hafði tilkynnt lögreglunni um að henni hefði verið nauðgað af karlmanni frá Norður-Afríku.

Stúlkan greindi frá því að karlmaðurinn hefði ráðist á hana og þegar hún hafi rankað við sér hafi hún verið hálfnakin og handtaskan hennar horfin. Guidotti sagði stúlkunni að hún hefði með framgöngu sinni „boðið alla velkomna“. „Mín kæra, það að vakna hálfnakin er það minnsta sem hefði getað komið fyrir þig,“ sagði hann.

Kaþólska kirkjan í Bologna hefur lýst því yfir að ummæli Guidottis séu á engan hátt lýsandi fyrir afstöðu kirkjunnar sem fordæmi ofbeldi af öllu tagi. Guidotti sagðist fyrst alls ekki hafa verið að ráðast á stúlkuna persónulega heldur aðeins „reyna að fá börn og foreldra þeirra til að hugsa“. Síðar baðst hann afsökunar.

• Blogga um frétt