Bandarísk YouTube stjarna, Logan Paul, hefur beðist afsökunar á að hafa birt myndskeið þar sem sést greinilega í fórnarlamb sjálfsvígs í Japan. Birting myndskeiðsins vakti harða gagnrýni en Logan Paul sést á myndskeiðinu í Aokigahara skóginum við rætur Fuji-fjalls. Skógurinn er þekktur sem sem sjálfsvígsskógurinn en eftir útgáfu skáldsögunnar Kuroi Jukai, þar sem ungur elskandi fremur sjálfsmorð í skóginum, hafa þar verið framin fjölmörg sjálfsvíg árlega. Vegna þessa hefur skiltum verið komið upp í skóginum þar sem fólki, sem íhugar sjálfsvíg, er bent á úrræði sér til hjálpar.
Í myndskeiðinu sést Logan Paul ganga fram á lík ásamt félaga sínum og á sama tíma og þeim er greinilega brugðið þá eru þeir að gantast sín á milli.
Meðal ummæla sem féllu eru „viðbjóðslegt“ og „vanvirðing“ en myndskeiðið var birt á gamlársdag. Milljónir hafa horft á myndskeiðið á YouTube en það hefur nú verið fjarlægt og Logan Paul beðist afsökunar á birtingunni í færslu á Twitter.
Yfir 15 milljónir eru áskrifendur að færslum Logan Paul á YouTube.
Dear Internet, pic.twitter.com/42OCDBhiWg
— Logan Paul (@LoganPaul) January 2, 2018