Rannsaka nauðgunarmál í Senegal

Stjórnvöld í Senegal og á Spáni eru sögð vinna náið saman að rannsókn á ráni og meintum nauðgunum sem þrír spænskir ferðamenn urðu fyrir í Casamance í Senegal í janúar. 

Þrjár konur sögðust hafa verið dregnar út í skóg og að þeim hefði verið nauðgað eftir að bíll þeirra bilaði 25. janúar. Konurnar voru einnig rændar. 

Innanríkisráðherra Spánar segist vinna náið með spænska sendiráðinu í Senegal að úrslausn málsins. Hann segir rannsóknina langt á veg komna. Ein konan er enn í Senegal en tvær eru farnar aftur heim til Spánar. 

Sagði engin merki um nauðgun

Innanríkisráðherra Senegal, Aly Ngouille Ndiaye, segist einnig fylgjast grannt með rannsókninni. Aðeins þremur dögum eftir árásina kom hann hins vegar fram í viðtali í útvarpi og sagðist hafa efasemdir um frásögn kvennanna. Sagði hann að læknisskoðun á einni konunni hefði „ekki sýnt nein merki um nauðgun“. Þá sagðist hann furða sig á því að aðeins peningum hefði verið stolið en ekki skartgripum kvennanna. 

Spænsk stjórnvöld sögðust í kjölfarið ekki ætla að tjá sig um málið fyrr en konurnar hefðu sjálfar veitt þeim upplýsingar um málsatvik. 

• Blogga um frétt