Karlmaður lést eftir alvarlegt slys sem tengist tveimur ökutækjum á Heathrow-flugvelli í dag. Annar maður slasaðist á öxl.
Slysið átti sér stað á flugbraut á vellinum og setti það áætlunarflug úr skorðum um hríð.
Í frétt Sky-sjónvarpsstöðvarinnar segir að lögregla og sjúkraflutningamenn hafi verið kallaðir á vettvang snemma í morgun. Mennirnir sem lentu í slysinu eru báðir sagðir starfsmenn á flugvellinum.
Í fréttinni er haft eftir lögreglu að annar mannanna hafi fengið hjartaáfall og að tilraunir til endurlífgunar báru ekki árangur. Hann var fluttur á sjúkrahús þar sem hann var úrskurðaður látinn.
Talsmaður flugvallarins staðfestir að slysið tengist tveimur ökutækjum á flugbraut. Frekari upplýsingar um tildrög slyssins eru ekki fáanlegar að svo stöddu.