Kristersson fær stjórnarmyndunarumboð
Alexander Gunnar Kristjánss. skrifar frá Stokkhólmi
Setja bókamerki
Ulf Kristersson, leiðtogi hægriflokksins Moderaterna, hefur fengið umboð forseta sænska þingsins til að mynda ríkisstjórn. Andreas Norlén, þingforseti og samflokksmaður Kristersson, greindi frá þessu í dag en hann hefur síðustu daga fundað með formönnum flokkanna sem eiga sæti á sænska þinginu.
Á blaðamannafundi í þinghúsinu, sem hófst nú fyrir stundu, sagði Kristersson að hann myndi gera allt sem er „löglegt og viðeigandi“ til að mynda ríkisstjórn hægribandalagsins, Alliansen, en að því standa, auk Moderaterna, Frjálslyndir, Miðflokkurinn og Kristilegir demókratar.
Hans fyrsta verk verður, að eigin sögn, að ráðfæra sig við formenn hinna flokka hægribandalagsins en því næst vill hann ræða við Stefan Löfven, formann Sósíaldemókrata og sitjandi forsætisráðherra. Mun hann að öllum líkindum freista þess á ný að sannfæra Löfven um að veita minnihlutastjórn hægribandalagsins stuðning.
Aðspurður sagði Kristersson að hann hefði ekki í hyggju að ræða við Svíþjóðardemókrata að sinni heldur hygðist hann einbeita sér að viðræðum við hina samstarfsflokkana í hægribandalaginu og Sósíaldemókrata.
Skemmtiferðaskip hætt komið nærri Viðey
Kaldasti veturinn kom að óvörum
Skiptir miklu meira máli en fólk grunar
„Umsátursástand“
Vélsleðaslys: Þyrlan kölluð út á mesta forgangi
Hvorki sést áður hér á landi né annars staðar