Sláandi vitnisburður Jemtland-sonar

Aðalmeðferð í máli Svein Jemtland hófst fyrir Héraðsdómi Hedmark á ...
Aðalmeðferð í máli Svein Jemtland hófst fyrir Héraðsdómi Hedmark á mánudaginn, þar sem honum er gefið að sök að myrða konu sína, Janne Jemtland, aðfaranótt 29. desember síðastliðins.

Þögn viðstaddra var algjör þegar upptökur af frásögn þá 13 ára gamals sonar Janne heitinnar Jemtland í skýrslutöku hjá lögreglu voru leiknar í sal 9 í Héraðsdómi Hedmark í dag og lýsti Olav Rønneberg, afbrotafréttaritari norska ríkisútvarpsins NRK, því í sjónvarpsfréttum í kvöld hvernig viðstaddir hefðu setið sem steinrunnir í dómsalnum, allir nema ákærði, Svein Jemtland, sem svarar nú til saka, grunaður um að hafa skotið eiginkonu sína í höfuðið er þau komu heim úr jólaboði aðfaranótt 29. desember í fyrra og varpað henni, að öllum líkindum enn á lífi, í ána Glommu þar sem lík hennar fannst um miðjan janúar á þessu ári. Svein einn hélt fullkomnum pókersvip í réttarsalnum í dag og sýndi engin svipbrigði.

Sonurinn, sem er nú 14 ára gamall og sá eldri tveggja sona þeirra hjóna, er eitt aðalvitni ákæruvaldsins í málinu, Iris Storås ríkissaksóknara, en aðalmeðferð þess hófst á mánudaginn og fer ákæruvaldið fram á þyngstu refsingu innan ramma norskra hegningarlaga yfir Svein Jemtland, 21 árs fangelsi.

Bað son sinn að ljúga að lögreglunni

Málið hefur verið hið óhugnanlegasta frá upphafi og voru íbúar smábæjarins Brumunddal, 140 kílómetra norður af Ósló, slegnir óhug þegar Janne heitin, 36 ára gömul, hvarf sporlaust rétt fyrir áramót. Eiginmaður hennar, 47 ára, sem nú er ákærður í málinu og ber því við að skot hafi hlaupið af skammbyssu í höfuð konu hans fyrir slysni er þau deildu, hafði samband við lögreglu daginn eftir atburðinn og tilkynnti um hvarf hennar. Degi síðar gagnrýndi hann lögreglu harðlega fyrir að hefja ekki leit strax en leit lögreglu hófst ekki fyrr en sólarhring eftir tilkynninguna.

Í krufningarskýrslu sem gerð var opinber 4. september í haust var því slegið föstu að dánarorsök Janne hefði verið drukknun og hafi hún þar með verið enn á lífi þegar eiginmaður hennar varpaði henni í ískalda ána Glommu, eftir að hafa bundið rafgeymi við líkama hennar til fergingar, einhvern tímann að morgni 29. desember síðastliðins en GSM-sendistöð nam merki frá síma hennar síðast klukkan 05:50 um morguninn. Talið er að skotið sem hæfði Janne í höfuðið hafi riðið af klukkan 02:15 þá um nóttina en um það leyti segist sonurinn hafa heyrt hvell.

Upptökurnar með framburði drengsins voru gerðar á tímabilinu 2. til 16. janúar en faðir hans var handtekinn 12. janúar og úrskurðaður í gæsluvarðhald. Kom þar meðal annars fram að faðirinn hefði beðið son sinn að ljúga að lögreglunni til að útskýra blóðbletti við útidyr hússins. Hann átti þá að segja að móðir hans hefði farið á skíði milli jóla og nýárs og fengið blóðnasir. Einnig var honum uppálagt að segjast hafa séð móður sína á ferli í húsinu síðar um nóttina.

„Að pabbi sé sekur“

Þetta var svar sonarins þegar rannsóknarlögregluþjónn sem stjórnaði skýrslutökunni, sérmenntaður í að taka framburðarskýrslur af börnum, bað hann að segja sér hvað hann héldi. Drengurinn hafði þá lýst atburðum næturinnar, háværu rifrildi foreldra hans eftir heimkomu þeirra og að einhver hafi heyrst detta niður stigann. Skömmu síðar hafi útidyrnar verið opnaðar og hávær hvellur glumið. Hann hafi þá verið orðinn mjög óttasleginn og sendi móður sinni SMS-skeyti: „Mamma?“ Við því barst ekkert svar.

„Ég heyrði í skúffu [opnast eða lokast] og svo heyrði ég að verið var að moka pallinn fyrir framan húsið,“ sagðist vitninu frá í skýrslutöku 2. janúar. Ekki sagðist drengurinn hafa verið viss um hver þar var við mokstur en hann hafi laumast að svefnherbergisdyrum foreldra sinna meðan á þessu stóð og ekki sagst vera viss um hvort nokkur hefði verið þar.

Hann sagði yngri bróður sínum, 11 ára gömlum, frá þeim grunsemdum sínum að faðir þeirra hefði stytt móður þeirra aldur þegar sá yngri kom heim daginn eftir þessa atburði. „Heldurðu virkilega að ég hafi drepið móður þína?“ spurði Svein Jemtland þegar sá yngri gekk á hann með frásögn bróður síns. Þegar lögregla ræddi við yngri drenginn um hvað hann teldi að hefði gerst stóð ekki á svarinu: „Ég var bara ringlaður. Þetta er jú pabbi minn.“

Næstu þrjár vikur verða um 30 vitni leidd fyrir fjölskipaðan héraðsdóminn auk þess sem lögregla og saksóknari leggja fram fjölda sönnunargagna gegn Svein Jemtland. Reikna má með að dómur falli á fyrstu vikum nýs árs.

Frásagnir norskra fjölmiðla af réttarhöldunum:

Frá NRK (framburður sonarins í dag)

Frá NRK (Svein neitar sakargiftum samkvæmt ákæru) 

Frá Aftenposten

Frá TV2

Frá Dagbladet

Frá ABC Nyheter

Frá VG

mbl.is
Fullbúin íbúð til leigu..
Íbúðin er 3ja herb. í Norðlingaholti á efstu hæð með lyftu. leigist með húsgö...
Gefins - áttu klink sem þú mátt missa?
Kattholt þiggur með þökkum smámynt (hvaðan sem er). Þetta fer til að fjármagna...
Leiga, herb. hús, við Gullna hringinn..
Studio herb. með sérbaði og eldunaraðstöðu, hlýleg og kósí, 5 mínútur frá Gey...
LAND ROVER DISCOVERY 3 S, sjálfsk., disel, 7 manna
Til sölu LAND ROVER DISCOVERY 3 S, sjálfskiptur, dísel, 7 manna ekinn 197.000 km...