Fjöldi frambjóðenda ræðst í dag
Setja bókamerki
Í dag ræðst hverjir verða í framboði til embættis formanns breska Íhaldsflokksins. Ellefu flokksmenn hafa lýst yfir áhuga á að leiða flokkinn sem og bresku þjóðina í hlutverki forsætisráðherra og þurfa þau að skila inn meðmælum frá átta þingmönnum flokksins.
Theresa May hætti formlega sem leiðtogi Íhaldsflokksins á föstudaginn en hún mun hins vegar sitja áfram sem forsætisráðherra þar til eftirmaður hennar hefur verið valinn.
Frestur til að skila meðmælum rann út klukkan 16 að staðartíma og von er á tilkynningu um samþykkt framboð hvað úr hverju. Jeremy Hunt, Dominic Raab, Michael Gove og Matt Hancock voru hins vegar ekkert að hika við hlutina og hrintu af stað kosningaherferðum sínum í dag.
Sam Gyimah, eini Íhaldsmaðurinn sem lýst hafði áhuga á leiðtogastöðunni sem er hlynntur nýrri þjóðaratkvæðagreiðslu um Brexit, hefur dregið framboð sitt til baka. Sagði hann ekki nægan tíma til stefnu til að afla nægilegs stuðning.
Að fá samþykkt framboð er hins vegar bara fyrsta skrefið í átt að leiðtogaembætti Íhaldsflokksins. Á fimmtudag greiða allir þingmenn flokksins atkvæði um þau sem skila inn gildu framboði í dag. Þau sem fá 17 atkvæði eða fleiri fara áfram í næstu umferð, sem fram fer í næstu viku. Í þeirri umferð þarf 33 atkvæði til að eiga möguleika á formannsembættinu. Þannig gengur það þar til tveir frambjóðendur standa eftir.
130 þúsund eru skráðir í Íhaldsflokkinn og hafa allir kosningarétt til að kjósa á milli tveggja frambjóðenda sem standa eftir og hefst sú atkvæðagreiðsla 22. júní. Mánuði síðar tekur nýr leiðtogi við embætti formanns breska Íhaldsflokksins.
Hér má fylgjast með beinni lýsingu BBC af framvindu mála.
Skar höfuðleðrið af íslenskri konu
„Höfum ekki náð að skríða upp úr þeirri gryfju“
Kaldasti veturinn kom að óvörum
Shakespeare fannst í skókassa
Sex hafa greinst með listeríu