Rússneskur dómstóll hefur hafnað kröfu saksóknara í Moskvu um að börn verði tekin af foreldrum sínum vegna þess að þeir tóku þau með sér í mótmælagöngur í borginni.
Þess í stað fengu foreldrar barnanna, þau Dmitry og Olga Prokazov og Petr og Elena Khomskikh, viðvörun. BBC greinir frá.
Mál fjölskyldnanna tveggja hefur vakið mikla reiði í Rússalandi, en saksóknarar hafa fullyrt að foreldrarnir hafi stefnt lífi barna sinna í hættu með því að taka þau með sér á mótmælin. Fjöldi manns hefur verið handtekinn undanfarnar vikur í tengslum við mótmæli vegna borgarstjórnarkosninga í Moskvu sem fram fara næsta sunnudag og hefur óeirðalögregla verið sökuð um að beita mótmælendur hörku.
Dómstóllinn úrskurðaði í málunum tveimur hvorum í sínu lagi, en úrskurðurinn í báðum tilfellum fól í sér formlega viðvörun til foreldranna. Var þeim sagt að þau gætu enn misst börnin létu þau sjá sig nokkurs staðar í nágrenni við mótmælin.
Lögfræðingar foreldranna sögðu báðar fjölskyldurnar ætla að áfrýja málinu.
Í máli Prokazov-fjölskyldunnar fullyrtu saksóknarar að foreldrarnir hefðu stefnt lífi barnsins, sem hefði verið „hjálparlaust sökum aldurs“, í hættu með því að afhenda drenginn þriðja aðila.
„Og þannig, með því að nýta drenginn, misnotuðu foreldrarnir uppeldisrétt sinn á kostnað hagsmuna sonar síns,“ sagði í yfirlýsingu frá saksóknaraembættinu í síðasta mánuði.
Þá var faðir drengsins einungis sagður hafa tímabundið dvalarleyfi í Moskvu og þar með ekki hafa kosningarétt í borgarstjórnarkosningunum.
Parið kvaðst í samtali við BBC í ágúst hins vegar eingöngu hafa leyft vini að halda á barninu.
Mál Khomskikh-fjölskyldunnar fékk ekki sambærilega athygli, en þar fullyrtu saksóknarar að foreldrarnir hefðu stefnt lífi tveggja ungra dætra sinna í hættu með því að vera með þær í nágrenni við „mótmælendur í ofbeldishug“.