Þrír eru látnir og sá fjórði liggur á sjúkrahúsi eftir alvarlegt slys í kappsiglingu frá Monte Carlo í Mónakó til Feneyja á Ítalíu.
Hraðbáturinn var á 148 km hraða á klukkustund þegar hann lenti á manngerðum varnargarði skammt frá marki í Lido di Venezia og kollsteyptist með fyrrgreindum afleiðingum.
Meðal þeirra sem létust eru Fabio Buzzi, tífaldur heimsmeistari í kappsiglingu. Hann var 76 ára gamall og hafði stundað kappsiglingar lengur en í fjóra áratugi. Hinir sem létust voru hollenskur vélvirki og Ítalinn Luca Nicolini.