Fimm ára gömul dóttir bresk-íranskrar konu sem situr í írönsku fangelsi er komin til Bretlands. Móðir hennar, Nazanin Zaghari-Ratcliffe, hjálparstarfsmaður frá London, hefur verið í haldi í þrjú ár sökuð um að vera njósnari. Hún hefur alltaf neitað ásökunum en var dæmd í fimm ára fangelsi. Ratcliffe var handtekin árið 2016 þegar hún var stödd í höfuðborg Írans, Tehran.
Dóttir hennar, Gabriella, bjó hjá móðurforeldrum sínum í Teheran en er nú komin heim til Bretlands þar sem faðir hennar, Richard Ratcliffe, býr. Í samtali við BBC í morgun segir hann að hún hafi komið seint í gærkvöldi og sé sofandi.
„Nú sefur hún friðsælum svefni við hliðina á mér og ég horfi bara á hana,“ segir Richard. Hann þakkar sendiráði Breta og íranska utanríkisráðuneytinu fyrir aðstoðina við að koma barninu heim.
Gabriella hefur heimsótt móður sína í hverri viku allt frá því hún var handtekin í apríl 2016. Fjölskylda Zaghari-Ratcliffe segir að hún hafi verið í Íran á sínum tíma til að kynna dóttur sína fyrir fjölskyldunni.
Richard Ratcliffe segir að hann hafi vonað allt til síðustu stundar að eiginkona hans fengi að koma heim með Gabriella.