Karlmanni frá Indónesíu, sem féll í yfirlið þar sem hann var húðstrýktur opinberlega vegna þess að hann stundaði kynlíf fyrir hjónaband, var komið aftur til meðvitundar til að hægt væri að ljúka refsingunni. Síðan var farið með manninn með hraði á sjúkrahús.
Barsmíðar eru algeng refsing fyrir ýmiss konar brot í Aceh-héraði á Súmötru. Má þar nefna fyrir veðmál, áfengisdrykkju eða samkynhneigð. Aceh er eina hérað Indónesíu þar sem saría-lög gilda.
22 ára karlmaður var dæmdur til að fá hundrað högg. Hann grátbað grímuklæddan mann sem húðstrýkti hann að hætta áður en leið yfir hann.
Manninum var komið til meðvitundar og fékk hann stutta læknisaðstoð áður en höggin héldu áfram að dynja á honum. Síðar var hann fluttur með hraði á sjúkrahús.
Maðurinn var fundinn sekur um að stunda kynlíf með konu en refsing hennar voru einnig hundrað högg.
Samkvæmt frétt AFP fylgdust um 500 manns með refsingunni og hvöttu grímuklædda manninn til að berja hinn seka af meiri krafti.
Mannréttindasamtök hafa harðlega gagnrýnt opinberar hýðingar og forseti Indónesíu, Joko Widodo, hefur óskað eftir því að þeim verði hætt. Íbúar Aceh styðja flestir slíkar refsingar.