Sala áfengis hefur verið bönnuð tímabundið í Nuuk á Grænlandi og tveimur öðrum bæjum í landinu. Kom þetta fram í tilkynningu á vef landstjórnar Grænlands í gær, en það er Kim Kielsen, formaður landstjórnarinnar, sem tók ákvörðunina.

Miðast bannið við áfenga drykki með meira en 2,25% áfengisinnihald. Tók það gildi klukkan 20:00 í gærkvöldi og gildir til 15. apríl.

Auk Nuuk nær bannið til Kapisillit og Qeqertarsuatsiaat.

Í tilkynningu á vef landstjórnarinnar kemur fram að í aðstæðum eins og nú, þar sem skólar, stofnanir, veitingastaðir og krár séu lokuð, geti yfirvöld lítið fylgst með neyslunni og muni hún líklegast aukast heima fyrir. Slíkt skaði ekki aðeins börn og heimilislíf, heldur dragi úr dómgreind fólks varðandi útbreiðslu veirunnar.

Í Nuuk hafa þegar komið upp 10 tilfelli smita. Segir Kim að við slíkar aðstæður þurfi að grípa til fjölda aðgerða, en hann horfi til þess að verja börnin, sem verði að fá að vera örugg heima fyrir.

Tengdar fréttir

Kórónuveiran Covid-19

Heimsfaraldurinn var æfing í seiglu

• Engar aukaverkanir eftir 217 bólusetningar
• „Við þurfum að vera tilbúin“
• Ríkið hafði betur gegn skjólstæðingi Arnars
• Hæstiréttur staðfestir efndaskyldu tveggja hótela

» Fleiri tengdar fréttir

• Blogga um frétt