Ísland besta landið til að stofna fjölskyldu

AFP

Hvergi er betra að stofna fjölskyldu en á Íslandi samkvæmt nýrri könnun Asher & Lyric. Bandaríkin eru aftur á móti í 34. sæti á lista 35 OECD-ríkja um hvar sé best að stofna fjölskyldu samkvæmt könnuninni, en aðeins Mexíkó fær lægri einkunn. 

Greint var frá könnuninni á vef Forbes, en þar kemur fram að Norðurlandaþjóðirnar Ísland, Noregur, Svíþjóð og Finnland tróni á toppi listans. 

Könnunin var unnin út frá 35 OECD-ríkjum og var lögð áhersla á 30 þætti, meðal annars öryggi, hamingju, menntun, kostnað og tíma. Ísland var talið öruggast allra 35 ríkjanna, var í fjórða sæti listans yfir kostnað og í fyrsta sæti á heildina litið. Mexíkó aftur á móti var neðst á listum yfir öryggi, heilsu og menntun, í 30. sæti í hamingju og neðst á heildarlistanum. 

Bandaríkin komu ekki mikið betur út en Mexíkó og voru í 34. sæti í heild. Foreldrar með meðaltekjur í Bandaríkjunum þurfa að jafnaði að eyða um 31,79% tekna sinna í beinan kostnað vegna barneigna en á Norðurlöndunum fara 3-10% heildartekna að jafnaði í beinan kostnað vegna barna. Þá eru bandarískar mæður tvisvar sinnum líklegri til að látast af barnsförum en mæður í Kanada, þar sem kostnaður vegna fæðingar á sjúkrahúsi er þó þrisvar sinnum lægri.

Þá voru Bandaríkin einnig í neðsta sæti listans yfir tíma, en þar tryggir ríkið ekki fæðingarorlof, veikindaleyfi eða greitt orlof og vinnuveitendur eru ekki skyldugir til að greiða starfsfólki sínu fyrir umræddan tíma. 

Heildarlisti yfir ríki þar sem best er að ala upp börn:

1. Ísland

2. Noregur

3. Svíþjóð

4. Finnland

5. Lúxemborg

6. Danmörk

7. Þýskaland 

8. Austurríki

9. Belgía 

10. Tékkland 

11. Holland 

12. Portúgal

13. Frakkland 

14. Ástralía 

15. Slóvenía 

16. Írland 

17. Spánn 

18. Nýja-Sjáland 

19. Kanada 

20. Pólland 

21. Ungverjaland 

22. Sviss 

23. Bretland 

24. Ítalía 

25. Japan 

26. Ísrael 

27. Slóvakía

28. Suður-Kórea 

29. Grikkland

30. Rúmenía 

31. Búlgaría

32. Tyrkland  

33. Síle 

34. Bandaríkin 

35. Mexíkó

mbl.is

Bloggað um fréttina