Ekki hefur tekist að greina uppruna leka sem virðist kominn að Alþjóðlegu geimstöðinni. Geimfarar voru vaktir upp um nótt í byrjun vikunnar og beðnir að leita lekans en hann virtist aukast á mánudag. Þá greindust hitabreytingar inni í geimstöðinni.
Greining leiddi í ljós að lekann mátti rekja til vinnusvæðis í Zvezda-álmunni. Þar er að finna vistarverur fyrir tvo geimfara og stjórnstöð.
Frekari greiningar er þörf til að staðsetja nákvæmlega staðinn þar sem lekinn á sér stað, að því er segir í frétt BBC um málið. Nasa hefur lýst því yfir að engin hætta steðji að geimförum að svo komnu máli og að óbreyttu feli þessi uppákoma aðeins í sér tilfærslu á vinnuáformum þeirra.
Uppákoman á mánudag var sú þriðja á rúmum mánuði þar sem geimfarar um borð í Alþjóðlegu geimstöðinni urðu að loka sig af í Zvezda-álmunni í leit að lekanum sem heldur áfram að aukast.