Vopnahlé milli Ísrael og palestínskra vígasveita Hamas á Gaza-svæðinu tók gildi í nótt eftir 11 daga blóðug átök. Yfir 240 hafa látist, flestir þeirra á Gaza.
Íbúar Gaza streymdu út á götur borgarinnar á meðan Hamas hefur varað við því að „fingurinn sé á gikknum“.
Báðir aðilar hafa lýst yfir sigri í átökunum.
Joe Biden Bandaríkjaforseti segir vopnahléið vera „raunverulegt tækifæri“ til framfara.
Vopnahléið tók gildi klukkan 2 í nótt að staðartíma, klukkan 23 að íslenskum tíma. Skömmu eftir að það tók gildi streymdu borgarar Gaza út á götur borgarinnar til að fagna ýmist friðnum, eða sigri. Hátalarar í moskum borgarinnar lýstu yfir „sigri mótspyrnunnar“.
Loftárásir Ísraela á Gaza-svæðið hafa orðið 232 Palestínumönnum að bana, þar á meðal 65 börnum, síðan átökin hófust 10. maí. Tæplega tvö þúsund særst, að sögn heilbrigðisráðuneytis Gaza-svæðisins. Árásirnar hafa haft í för með sér mikla eyðileggingu á svæðinu og um 120 þúsund manns hafa þurft að yfirgefa heimili sín, að sögn Hamas. Samkvæmt ísraelskum heilbrigðisyfirvöldum hafa 12 ísraelskir borgarar látist í átökunum, þeirra á meðal eru börn.