Stjórnvöld Moldóvu óttast að landið gæti orðið næsta skotmark Vladimírs Pútíns Rússlandsforseta í kjölfar innrásar Rússa í Úkraínu.
Moldóva, sem á landamæri að Úkraínu, tók á móti utanríkismálastjóra ESB, Josep Borrell, í gær og mun einnig taka á móti Antony Blinken, utanríkisráðherra Bandaríkjanna, um helgina.
Borrell hefur lýst áhyggjum sínum af „óstöðugleika við landamærin“ sem átökin gætu valdið.
Íbúi í bænum Palanca í Moldóvu segir við blaðamann AFP-fréttastofunnar að allir bæjarbúar séu smeykir en Palanca liggur við landamæri Úkraínu.
Hann hefur boðið sig fram til að útvega te og kaffi fyrir úkraínska flóttamenn sem hafa flúið yfir landamærin síðan Rússar réðust inn í land þeirra fyrir réttri viku.