Íslenskur hundamatur brátt á markað

Brátt kemur á markað íslenskur hundamatur, Urr smáhundamatur, framleiddur af fyrirtækinu Murr ehf í Súðavík. Nú þegar er hægt að fá kattamat frá fyrirtækinu. Fyrirtækið er staðsett í Súðavík og starfa þar fjórir starfsmenn.

„Hundar eru til af öllum stærðum og gerðum. Þeir smæstu vega ekki mikið meira en kíló en þeir stærstu vega tugi kílóa. Það er því ákaflega mikilvægt að fóður miðist við stærð og hreyfiþörf hundsins“, segir í kynningarbæklingi sem Murr hefur gefið út.

Murr ehf. hefur undanfarin tvö ár unnið að undirbúningi framleiðslu á íslenskum kattamat. Hefur vöruþróun og uppsetning verksmiðju á Súðavík gengið vel.

Murr ehf. hefur átt gott samstarf við Norðlenska sláturhúsið á Akureyri og SAH afurðir á Blönduósi í þessu nýsköpunarverkefni sem felst í framleiðslu á verðmætum afurðum úr áður vannýttu hráefni.

Fjórir starfsmenn starfa hjá Murr ehf. og vonast er til að þeim fjölgi þegar framleiðslan verður komin á fullan skrið. Fyrstu vörurnar sem Murr setur á markað eru heilfóður fyrir fullorðna ketti og hundasælgæti. Mjög mikil áhersla hefur verið lögð á að nota einungis hreinar náttúrulegar afurðir og engin uppfyllingar- eða aukaefni.

Bragi Líndal Ólafsson fóðurfræðingur og Þorleifur Ágústsson dýralífeðlisfræðingur hafa stýrt þróunarvinnu fyrirtækisins. Unnið er að þróun fjölbreyttrar vörulínu og er meðal annars stefnt að því að þróa fóður sem sérstaklega verður ætlað fyrir unga ketti annarsvegar og eldri ketti hinsvegar. Mikill áhugi er á því hjá sláturleyfishöfum að Murr taki við áður vannýttu hráefni. Með því er meðal annars mögulegt að lækka förgunarkostnað til muna og auka verðmæti sláturafurða, sem ætti að skila sér í fjárhagslegum ávinningi fyrir bændur.

• 2 blogg um fréttina

Bloggað um fréttina

• Sigríður Hrönn Elíasdóttir: Ánægjulegt að lesa jákvæðar fréttir
• LAPPI: Íslenskt! Já takk!