Sýknaður í Vegasmáli

Hæstiréttur sýknaði í dag Sigurþór Arnarsson af ákæru í svonefndu Vegasmáli. Sigurþór var sýknaður í héraðsdómi árið 1998 en sakfelldur í Hæstarétti árið eftir. Hann fékk málið tekið upp og var sýknaður eftir skoðun Hæstaréttar öðru sinni.

Málið var höfðað í júlí 1997 á hendur Sigurþóri og öðrum manni. Þeim var gefið að sök að hafa sparkað í höfuð manns þar sem hann lá á gólfi veitingahússins Vegas í kjölfar þess að Sigurþór greiddi manninum höfuðhögg með þeim afleiðingum að hann féll í gólfið. Maðurinn lést af völdum heilablæðingar sólarhring eftir atvikið.

Héraðsdómur sýknaði Sigurþór af ákærunni en Hæstiréttur sakfelldi hann og dæmdi í tveggja ára og þriggja mánaða fangelsi.

Hæstiréttur féllst á beiðni Sigurþórs um endurupptöku málsins í sumar.

Í dómi Hæstaréttar segir að engin efni standi til að niðurstaða héraðsdóms um mat á sönnunargildi munnlegs framburðar í málinu sé röng svo einhverju máli skipti um úrslit máls. Sigurþór hafi staðfastlega neitað sök og ákæruvaldinu ekki tekist að setja fram sönnunargögn til stuðnings sakfellingu.

• Blogga um frétt