Innlent | mbl | 1.1.2013 | 11:12

Sérsveitin kölluð út vegna vopnaðs manns

Ljósmynd/Kristinn Freyr Jörundsson

Kalla þurfti sérsveit ríkislögreglustjóra út í morgun vegna manns sem var vopnaður í heimahúsi í Hafnarfirði.

Lögreglan fékk um kl. 5 í morgun tilkynningu um slagsmál í heimahúsi í Hafnarfirði. Þegar lögreglumenn komu á vettvang kom í ljós að maður í húsinu var vopnaður haglabyssu. Sérsveit ríkislögreglustjóra var kölluð á staðinn og handtók hún manninn og var hann vistaður í fangageymslu lögreglunnar við Hverfisgötu. Haglabyssan reyndist óhlaðin. Einnig fannst á vettvangi riffill. Lagt var hald á vopnin og eru þau í vörslu lögreglu.

Um kl. 05:36 var tilkynnt um líkamsárás utan við bar á Hverfisgötu. Þarna hafði karlmaður veist að tveim stúlkum og slegið þær og sparkað í þær þannig að á þeim sá. Þær fóru á slysadeild til aðhlynningar. Árásarmaðurinn farinn af vettvangi þegar lögregla kom og hefur ekki fundist en lögregla telur sig vita hver hann er.

Talsvert hefur verið að gera hjá lögreglunni í nótt og í morgun. Eitthvað var um minniháttar pústra í miðbænum. Þá var mikið að gera í því að sinna allskyns útköllum, vegna hávaða, aðstoð við leigubifreiðastjóra og fleira sem allt tengist ölvun.

Þá gista 10 fangageymslu lögreglu vegna ýmiss konar mála.