Líflegar umræður urðu um gjaldtöku á ferðamannastöðum á málþingi Landssamtaka landeigenda á Íslandi. Málþingið var haldið í kjölfar aðalfundar landssamtakanna 20. febrúar sl. á Hótel Sögu.
„Við erum ekkert á móti náttúrupassa,“ sagði Örn Bergsson frá Hofi í Öræfum, formaður Landssamtaka landeigenda, í samtali um þetta þrætuepli í Morgunblaðinu í dag.
„Við höfum bent á aðra leið. Hún er sú að strax verði farið í að innheimta gjald á þessum stóru fjölsóttu ferðamannastöðum. Svo væri hugsanlegt að taka eitthvert komugjald til landsins eða hækka flugvallaskatt, fara einfalda leið til að fjármagna minni staði. Við útilokum ekki eitt eða neitt í þessu.“