Sérsveitin yfirbugaði konuna

Sérsveit ríkislögreglustjóra var kölluð út fyrir hádegið í dag til að aðstoða lögregluna á Selfossi. Samkvæmt heimildum mbl.is eru lögregluaðgerðir í gangi við fjölbýlishús á Selfossi. Lögreglan verst allra frétta af aðgerðinni en staðfesti við mbl.is að sérsveitin væri í bænum.

Fréttin verður uppfærð þegar frekari upplýsingar fást.

Uppfært klukkan 12.41

Samkvæmt heimildum mbl.is var tilkynnt um vopnaða konu á svölum fjölbýlishúss við Aðaltjörn. Konan er vopnuð haglabyssu og miðar henni á gangandi vegfarendur. Lögregla er á svæðinu og hefur lokað nokkuð stóru svæði í kringum fjölbýlishúsið.

Uppfært klukkan 13.00

Blaðmaður mbl.is á vettvangi segir að umsátursástand standi enn yfir. Þrír sérsveitarmenn í fullum skrúða standa við dyr íbúðar konunnar. Mögulega ætla þeir sér að ráðast inn.

Uppfært klukkan 13.20

Konan hefur verið yfirbuguð og flutt á brott.

Uppfært klukkan 13.21

Tilkynning frá lögreglunni: „Klukkan 10:21 barst lögreglu tilkynning um konu í bíl sem ók upp að ungum karlmanni á Langholti á Selfossi, stöðvaði bíl sinn og miðaði skammbyssu að manninum og hvarf síðan á braut. Bíll konunnar fannst mannlaus skömmu síðar fyrir utan íbúðablokk á Selfossi. Lögreglumenn höfðu sjónpóst á húsinu meðan beðið var eftir liðsafla sérsveitar ríkislögreglustjóra. Skömmu áður hafði konan beint byssu að öðrum manni á Árvegi.

Gerðar voru áætlanir um að ná til konunnar og gripið til allra öryggis- og viðbragðsáætlana eins og gert er í tilvikum sem þessum. Klukkan 12:56 gekk konan lögreglu á hönd. Konan var handtekin og aðgerðum lögreglu á staðnum lauk þar með. Málið er nú í höndum rannsóknardeildar lögreglunnar á Suðurlandi sem rannsakar málið.“

Uppfært klukkan 13.25

Blaðamaður mbl.is á vettvangi ræddi við nágranna konunnar eftir að hún var handtekinn. Sá sagði að oft bærist nokkur hávaði frá íbúð konunnar og hefði verið um langa hríð. Hins vegar hefði ekkert í líkingu við þetta komið upp áður og ekkert sem benti til þess að það gæti gerst. Þá sagði hann að nágrannar og íbúar Selfoss væru mjög skelkaðir eftir atburðinn.

• 4 blogg um fréttina

Bloggað um fréttina

• Jack Daniel's: Rangfærslur, ýkjur og lygar í þessari svokölluðu frétt
• Ásthildur Cesil Þórðardóttir: Sérsveitin?
• Jóhannes Ragnarsson: Terroristatilræði á Selfossi eftir að stjörnusýslumaðurinn fór til Suðurnesja
• Ásgrímur Hartmannsson: Úúú! Áróður!