Segir Árna hafa verið vanhæfan

Tryggvi Gunnarsson, umboðsmaður Alþingis, hefur komist að þeirri niðurstöðu að Árni Sigfússon hafi verið vanhæfur til að veita styrki úr Orkusjóði til Nýsköpunarmiðstöðvar Íslands í fyrrahaust vegna tengsla sinna við forstjóra miðstöðvarinnar en hann er bróðir Árna.

Umboðsmaður telur einnig að úthlutanir úr Orkusjóði í fyrrahaust hafi þar af leiðandi ekki verið í samræmi við lög. Þetta kemur fram í áliti umboðsmanns Alþingis. Kjarninn greindi fyrst frá málinu.

Kvartað var til umboðsmanns yfir ákvörðun Ragnheiðar Elínar Árnadóttur, iðnaðar- og viðskiptaráðherra, um úthlutun úr Orkusjóði. Athugasemdir lutu einkum að hæfi formanns ráðgjafanefndar Orkusjóðs til meðferðar málsins og efni tilkynningar sem birt var á vefsíðu atvinnuvega- og nýsköpunarráðuneytsins í kjölfar úthlutunarinnar.

Samkvæmt gögnum málsins auglýsti Orkustofnun eftir umsóknum um rannsóknarstyrki úr Orkusjóði í janúar og febrúar 2015.

Í auglýsingu sem birt var, m.a. á vefsíðu stofnunarinnar, var tekið fram að við úthlutun styrkja 2015 yrði sérstök áhersla lögð á hagkvæma orkunýtingu og orkusparnað, innlenda orkugjafa, vistvænt eldsneyti og sparnað jarðefnaeldsneytis, öflun þekkingar á þessum sviðum og miðlun hennar, rannsóknir, þróun og samstarf sem að þessu miðaði og atvinnusköpun.

Í niðurstöðukafla álitsins segir:

„Með vísan til framangreinds er það niðurstaða mín að þátttaka formanns ráðgjafarnefndar Orkusjóðs í tillögugerð við undirbúning ákvörðunar ráðherra um úthlutun úr Orkusjóði 2015 hafi farið í bága við hæfisreglur stjórnsýslulaga vegna tengsla hans við fyrirsvarsmann eins umsækjanda og að meðferð málsins hafi að þessu leyti ekki verið í samræmi við lög.“

Þá segir umboðsmaður einnig að í þessu máli liggi fyrir að úthlutun styrkja úr sjóðnum sé lokið og ekkert liggi fyrir um hvort og þá hvaða áhrif annmarki hafði á möguleika þess sem kvartaði til að hljóta styrk úr sjóðnum við þá úthlutun. Segir umboðsmaður það verkefni dómstóla að skera úr um hvort annamarkinn leiði til bótaskyldu.

• 1 blogg um fréttina

Bloggað um fréttina

• Kristbjörn Árnason: Enn eitt eineltið gegn flottum athafnamönnum