Innlent | mbl | 4.4.2016 | 16:35

Nefndi ýmislegt í „óðagoti“

Sigmundur Davíð horfir til himins í þingsalnum í dag. mbl.is/Eggert

Sigmundur Davíð Gunnlaugsson, forsætisráðherra, segir að svör sín í viðtali við Kastljós hafi byggst á undrun vegna spurninganna sem hann var spurður og hann hafi nefnt „ýmislegt í óðagoti“. Með því hafi hann ekki reynt að dreifa athygli frá málinu og segist síðan hafa gefið afdráttarlaus svör.

Í óundirbúnum fyrirspurnartíma á Alþingi í dag spurði Katrín Jakobsdóttir, formaður Vinstri grænna, forsætisráðherra hvers vegna hann hefði ekki bara sagt satt þegar hann var spurður út í hvort hann hefði komið nálægt aflandsfélögum og um aðkomu sína að félaginu Wintris í viðtali við fréttamann sænska ríkisútvarpsins og Reykjavík Media sem birtist í Kastljósi í gærkvöldi.

Sigmundur Davíð sagðist hafa nefnt ýmislegt í óðagoti á meðan hann reyndi að ná áttum um hvers vegna umræðan í viðtalinu væri orðin allt önnur en boðað hafi verið. Katrín spurði hann þó hvort að það væri ekki eðlileg krafa að hann segði satt í viðtölum jafnvel þó að spurningarnar kæmu honum á óvart.

Tók forsætisráðherra undir að það væri eðlileg krafa. Ítrekaði hann að hvorki hann né kona hans hafi átt eignir í skattaskjóli. Hann hafi þegar gert ítarlega grein fyrir eignarhaldi félagsins og eignum þess.

Auðvitað hafi komið á hann þegar hann var spurður út í félagið en með því hafi hann ekki verið að reyna að dreifa athyglinni. Um leið og hann hafi verið spurður beint um félagið hafi hann svarað afdráttarlaust.