„Það mátti við því búast að það væri erfitt að fá svona háttsettan yfirmann lögreglu rannsakaðan almennilega,“ segir Garðar Steinn Ólafsson, lögfræðingur Gunnars Scheving Thorsteinssonar lögreglumanns, sem ásamt starfsmanni Nova kærði Öldu Hrönn Jóhannsdóttur, aðallögfræðing lögreglunnar á höfuðborgarsvæðinu. Settur héraðssaksóknari í málinu, Lúðvík Bergvinsson, hefur fellt málið niður þar sem hann telur litlar líkur á sakfellingu. Garðar Steinn ætlar að áfrýja þeirri niðurstöðu til setts ríkissaksóknara.
Frétt mbl.is: Mál Öldu Hrannar fellt niður
Tvímenningarnir sökuðu Öldu um að hafa misbeitt lögregluvaldi sínu við rannsókn LÖKE-málsins svokallaða sem snerist um meintar uppflettingar í innra kerfi lögreglunnar. Gunnar var upphaflega ákærður fyrir það en ríkissaksóknari féll síðar frá þeirri ákæru. Hann var hins vegar sakfelldur í Hæstarétti fyrir að hafa greint vini sínum frá því á Facebook að hann hafi verið skallaður af ungum dreng við skyldustörf. Var honum þó ekki gerð refsing vegna málsins.
Í yfirlýsingu sem Alda Hrönn sendi fjölmiðlum í gær vísar hún í niðurstöðu setts héraðssaksóknara þar sem segi að ekkert bendi til þess að „kærða hafi í heimildarleysi rannsakað málið, aflað upplýsinga, dreift nektarmyndum eða borið rangar sakargiftir á kærendur. Enn fremur hafa ekki komið fram neinar upplýsingar sem færa rök að því að kærða hafi veitt fjölmiðlum upplýsingar sem leynt áttu að fara, eða dreift þeim með ólögmætum hætti, líkt og haldið er fram í kæru.“
Garðar Steinn segir í samtali við mbl.is að í ákvörðun héraðssaksóknara komi fram að nokkuð erfiðlega hafi gengið að fá lögreglu til að aðstoða við rannsókn málsins. Lúðvík var skipaður saksóknari í LÖKE-málinu í ágúst en bæði embætti héraðssaksóknara og ríkissaksóknara lýstu sig vanhæf til að fjalla um það.
„Hann fær einn lögreglumann í nokkur viðtöl en kæran kom fram allnokkru fyrir það,“ segir Garðar. „Í tvo mánuði þarf hann að berjast fyrir því að fá einhvern til að aðstoða sig.“
Garðar segir að engar skýrslur hafi til dæmis verið teknar af brotaþolum, þeim Gunnari Scheving og starfsmanni Nova. „Þannig að þær upplýsingar sem [héraðssaksóknari] hefur eru mjög takmarkaðar.“
Alda Hrönn hefur sagt að hún hafi eingöngu komið að rannsókn meintra brota lögreglumanna í LÖKE-málinu sem löglærður fulltrúi. Rannsóknin hafi verið á forræði ríkissaksóknara og að óskað hafi verið eftir aðstoð lögreglustjórans á Suðurnesjum þar sem Alda starfaði.
Garðar Steinn efast hins vegar um að sú skýring ríkissaksóknara standist að settur saksóknari hafi gefið Öldu Hrönn munnleg fyrirmæli um að hefja rannsókn á LÖKE-málinu án þess að það hafi verið skráð fyrr en rannsókninni var lokið. Þetta kallar Garðar „eftiráskýringu.“
Hann segist því sammála því að mál skjólstæðings síns sé ekki líklegt til sakfellingar miðað við þau gögn sem fyrir liggja.
Garðar segir að ef þrýst væri á lögreglu að taka fleiri skýrslur, spyrja tiltekinna spurninga, væri hægt að varpa frekara ljósi á málið.
„Ég held að lögreglumenn á Suðurnesjum myndu staðfesta að [Alda] hafi haft boðvald yfir þeim sem varalögreglustjóri þar, þrátt fyrir að hún hafi lagt fram eitthvert skipurit sem eigi að sýna annað. Ég held að þeir myndu ekki neita fyrir það að hún hefði gefið allar skipanir í rannsókninni, ef þeir yrðu spurðir að því.“