Guðmundar- og Geirfinnsmálið fer vonandi fyrir Hæstarétt í lok þessarar viku eða í næstu viku. Þetta segir Davíð Þór Björgvinsson, settur saksóknari í málinu. „Þetta er að dragast af ástæðum sem eru utan míns umráðasviðs, en ég vona að þetta fari að ganga upp og að málið komist fyrir Hæstarétt sem allra fyrst og mín vinna miðast við það,“ segir Davíð Þór í samtali við mbl.is.
Ekki liggur fyrir hvenær málflutningur fari fram, en áður hefur verið greint frá því að vonast væri til að málflutningur í málinu fari fram í vetur. „Ég held að það vilji allir flýta þessu eins og kostur er,“ segir Davíð Þór.
Fyrirköll eru tilbúin í Guðmundar- og Geirfinnsmálum, en endurupptökunefnd féllst í febrúar á endurupptökubeiðnir fimm af þeim sex sem voru menn sem sakfelldir voru í tengslum við mannshvarfsmálin tvö á áttunda áratugnum.
Davíð Þór tekur sæti sem einn af dómurum Landsréttar um áramótin. Er hann er spurður hvort sú skipan muni hafa áhrif á stöðu hans sem saksóknari í málinu, segist hann ekki vita til þess að þau mál hafi verið rædd í dómsmálaráðuneytinu. „Ég vinn í málinu fram til áramóta, en að öðru leyti er ekki tímabært að ég tjái mig um þetta.“