Nemendur og kennarar Listaháskólans hafa í dag heimsótt kosningaskrifstofur framboðslistanna í Reykjavík til að vekja, í aðdraganda þingkosninganna, athygli á húsnæðisvanda skólans. Grímu- og gallaklæddur hópurinn heimsótti m.a. kosningaskrifstofur Pírata og Sjálfstæðisflokksins.
„Við vorum að gera grein fyrir því ástandi sem ríkir í Listaháskólanum og allt um lykjandi og aðkallandi húsnæðisvanda skólans,“ segir Ilmur Dögg Gísladóttir, kynningarstjóri Listaháskólans. Ástandið sé sérstaklega slæmt hjá sviðslistadeildinni við Sölvhólsgötu, sem einmitt var þarna á ferð. „Ástæðan fyrir að þau eru í göllunum vísar í hvað húsnæðið er óheilbrigt. Það hefur verið greind mygla þar og nemendur verða veikir.“
Hóparnir lásu upp yfirlýsingu í heimsókn sinni. „Auk þess sem við gáfum öllum stjórnmálaflokkunum grjót sem hefur molnað úr þakskegginu á Sölvhólsgötu sem tákn um þessar molnandi undirstöður. Okkur var tekið vel alls staðar og á okkur var hlustað, þannig að við erum hæfilega bjartsýn á framhaldið.“
Húsnæðismál Listaháskólans hafi verið óásættanleg frá stofnun og því vilji nemendur og kennarar vekja athygli á, enda hafi þeir fengið nóg. „Markmiðið var að sameina listaskóla á framhaldsskólastigi í háskóla undir einu þaki. Það var markmiðið 1999 og okkur finnst kominn tími til þess að skólinn sé sameinaður,“ sagði Ilmur.
„Við teljum að krafturinn verði enn þá meiri með því að komast undir eitt þak.“