Formenn allra stjórnmálaflokka sem eiga fulltrúa á Alþingi funda nú í Alþingishúsinu og fara yfir störf þingsins framundan. Formennirnir komu saman á fundi í hádeginu, en luku þeim fundi án niðurstöðu svo honum er fram haldið nú.
Fundum þingflokkanna þriggja sem staðið hafa í stjórnarmyndunarviðræðum lauk fyrir skömmu, en þar kynntu formennirnir fyrirhugaðan stjórnarsáttmála. Formenn flokkanna þriggja, þau Katrín Jakobsdóttir, Bjarni Benediktsson og Sigurður Ingi Jóhannsson, hyggjast þá leggja stjórnarsáttmálann fram á fundum flokksstofnana flokkanna á miðvikudag.
Virðast formennirnir þrír vera vongóðir um myndun ríkisstjórnar á næstu dögum.
Fyrri fundur formanna allra flokka á Alþingi hófst klukkan 12 í dag, en lauk um klukkan 13 þegar þingflokkar flokkanna áttu fundi. Ekki fékkst niðurstaða í fundinn og var því ákveðið að halda honum áfram eftir þingflokksfundina.