Fyrirtöku í máli Glitnis gegn Stundinni og Reykjavík Media sem átti að fara fram í Héraðsdómi Reykjavíkur í dag hefur verið frestað um eina viku.
Ástæðan er sú að gagnaöflun er enn í gangi, samkvæmt upplýsingum mbl.is.
Málið snýst um staðfestingu á lögbanni sýslumannsins á höfuðborgarsvæðinu gegn birtingu fjölmiðlanna á frétt upp úr gögnum um viðskiptavini Glitnis, þar á meðal Bjarna Benediktsson fjármálaráðherra.
Málflutningur hefst 5. janúar og er reiknað með því að héraðsdómur kveði upp úrskurð sinn upp úr miðjum janúar.
Glitnir HoldCo ehf. fer fram á að lögbannið verði staðfest á birtingu fjölmiðlanna á fréttum sem unnar eru upp úr fyrrnefndum gögnum og vísar þar til þess að forsvarsmenn þeirra hafi lýst því yfir að þeir hafi ekki verið búnir að birta allar þær fréttir upp úr gögnunum sem þeir hefðu viljað þegar lögbannið hafi verið sett á notkun gagnanna.