Jón Karl Ólafsson, framkvæmdastjóri flugvallarsviðs Isavia, ætlar ekki að taka þátt í leiðtogakjöri Sjálfstæðisflokksins í Reykjavík vegna sveitarstjórnarkosninganna í vor.
„Ég ætla mér ekki að fara í pólitík í bili,“ segir hann í samtali við mbl.is.
Aðspurður segir hann ákvörðunina hafa verið erfiða. „Það kom mér á óvart hvað margir töldu þetta góða hugmynd. Ég ákvað að taka helgina í þetta til að ákveða mig endanlega.“
Jón Karl starfaði áður sem forstjóri Icelandair.
Fleiri hafa verið nefndir í tengslum við leiðtogakjörið, þar á meðal Eyþór Arnalds, framkvæmdastjóri og fyrrverandi oddviti sjálfstæðismanna í Árborg, Borgar Þór Einarsson, hæstaréttarlögmaður og aðstoðarmaður Guðlaugs Þórs Þórðarsonar utanríkisráðherra, og Unnur Brá Konráðsdóttir, fyrrverandi forseti Alþingis og þingmaður Sjálfstæðisflokksins. Þau tvö síðarnefndu hafa bæði ákveðið að gefa ekki kost á sér.
Tvö hafa lýst yfir framboði í leiðtogakjörinu. Borgarfulltrúarnir Áslaug Friðriksdóttir og Kjartan Magnússon.