Claudia andlit Hríseyjar

Þýski íslenskufræðingurinn Claudia Andrea Werdecker lætur sér ekkert fyrir brjósti brenna og hefur í tæp tvö ár séð um allt sem viðkemur Hríseyjarbúðinni auk þess sem hún er í þriggja manna stjórn verslunarinnar.

„Búðin er starf mitt og helsta áhugamál,“ segir Claudia sem var í fríi í Þýskalandi og Danmörku á dögunum, fór á skíði og notaði tækifærið og kynnti sér sambærilegan rekstur á dönsku eyjunni Lyö.

Um 100 manns búa í Hrísey í Eyjafirði, miðbæ Akureyrar, eins og sumir kalla eyjuna, sem er rómuð fyrir náttúrufegurð og fuglalíf. Fáir gestir eru þar á ferli á veturna en straumurinn eykst á sumrin og heimamenn stofnuðu félag um verslunina fyrir tæplega þremur árum. „Búðin er aðalsamkomustaðurinn í eyjunni og skiptir okkur eyjarskeggja miklu máli,“ segir Claudia. Hún bendir á að byggðaþróunarverkefnið „Brothættar byggðir“ hafi styrkt Hríseyjarbúðina talsvert undanfarið og er bjartsýn á framhaldið. Þjónustan skipti alla máli og rætt hafi verið um að bæta við kaffihúsi í sumar.

Sjá viðtal við Claudiu Andreu í heild á baksíðu Morgunblaðsins í dag.