„Við erum í hlýjum loftstraumi þessa dagana. Hitinn á eftir að skríða hærra þegar líður á daginn. Þetta er hlýjasti dagurinn í kortunum og ekki víst að hitinn fari jafn hátt á næstunni,” segir Teitur Arason, veðurfræðingur hjá Veðurstofu Íslands. Það er því tilvalið fyrir fólk að nýta daginn til útivistar.
Hitinn er núna 9,2 stig við Hafnarfjall. Hann mun hækka þegar líður á daginn og skríða í tveggja stafa tölu. Veðrið næstu vikuna verður keimlíkt og nokkuð meinlaust. Hitinn á þó eftir að fara niður fyrir frostmark í kvöld fyrir norðan.
Þrátt fyrir að vor sé í lofti í dag, segir Teitur að ekki sé hægt að fullyrða að vorið sé komið. Mars er flokkaður sem vetrarmánuður auk þess séu páskarnir eftir og þeim fylgir oftar en ekki tilheyrandi páskahret.