Lögreglan á höfuðborgarsvæðinu lagði hald á skotvopn og ætluð fíkniefni í húsleit í íbúð í Grafarvogi í gærkvöldi. Í dagbók lögreglunnar koma ekki fram frekari upplýsingar um málið.
Lögreglan stöðvaði marga ökumenn í gærkvöldi og nótt vegna gruns um akstur undir áhrifum vímuefna. Síðdegis í gær var t.d. för ökumanns við Súðavog stöðvuð þar sem hann hafði ekið á móti einstefnu. Ökumaðurinn er grunaður um akstur undir áhrifum fíkniefna og fyrir að aka án ökuréttinda. Þá reyndist bíllinn ótryggður og var skráningarnúmer því klippt af.