„Við hefðum kosið að áður en verkefnið hófst hefði staðan verið tekin þannig að við gætum metið árangur barnanna,“ segir Erling Ragnar Erlingsson sviðsstjóri miðlunarsviðs hjá Menntamálastofnun um spjaldtölvuvæðingu í grunnskólum.
Þar hefur Kópavogsbær verið í fararbroddi en framundan er mat á verkefninu. Reynt verður að leggja mat á áhrif og ávinning af spjaldtölvuvæðingunni en tveir árgangar í grunnskólum bæjarins hafa spjaldtölvur sem þeir nota í skólanum og heima við.
Björn Hjálmarsson, geðlæknir á Barna- og unglingageðdeild Landspítalans, kallaði eftir því í samtali við mbl.is í gær að spjaldtölvuvæðing í grunnskólum væri tekin til endurskoðunar og að áhrif hennar væru rannsökuð.
Erling segist vera meðvitaður um þessa gagnrýni og vita til þess að foreldrar hafi látið í ljósi óánægju með að börnum séu afhentar spjaldtölvur til að hafa með sér heim úr skólum. Skólarnir séu þó á forræði sveitarfélaganna og því sé það ekki hlutverk stofnunarinnar að leggja mat á þeim þætti verkefnisins.
„Hinsvegar erum við sammála því að þetta getur verið inngrip og haft áhrif á börnin og heimilislífið. Ég tala nú ekki um ef að foreldrar þurfa að slökkva á netinu til að börnin hætti að nota tölvurnar.“ Spjaldtölvuvæðing hafi mun viðameiri afleiðingar en aðgerð á borð við að skipta út námsefni í íslensku eða stærðfræði.