Slökkviliðið telur sig vera komið með tök á eldinum í Garðabæ en mikil vinna er framundan. Reykmengun frá brunanum er að mestu gengin yfir.
Þetta kemur fram í tilkynningu frá slökkviliðinu á höfuðborgarsvæðinu.
Fram kemur að vegna þess að reykurinn er mjög skaðlegur er ráðlagt að halda börnum í leik- og grunnskólum áfram innandyra.
Fólki með viðkvæm öndunarfæri er líka ráðlagt að halda sig innandyra. Á það helst við um nágrenni brunastaðar en líka þá staði þar sem vart verður við reyk.
Eitraðan reyk hefur lagt yfir íbúðarbyggð í Hafnarfirði og á Álftanesi frá því í morgun og voru hús rýmd í nágrenninu. Fólk var beðið um að halda sig innandyra, loka gluggum og hækka hitastigið ef það yrði vart við reyk.