Nýr Herjólfur er að taka á sig mynd hjá skipasmíðastöðinni CRIST C.A. í Póllandi. Nýlega var brú skipsins hífð upp á skrokkinn og fest þar.
Friðfinnur Skaftason, verkfræðingur í samgönguráðuneytinu, sem á sæti í byggingarnefnd nýrrar Vestmannaeyjaferju, segir að verkið sé á áætlun. Upphaflegar áætlanir gerðu ráð fyrir að skipið kæmi til landsins fyrir Þjóðhátíð í ár.
Hins vegar var sú breyting gerð að skipið verður að hluta knúið með rafmagni. Nokkrar tafir munu verða á afhendingu skipsins vegna þessara breytinga. Nú er talið líklegast að það verði afhent í september og verði þá komið hingað til lands í október eða nóvember nk.