Hefja mótun nýsköpunarstefnu

Þórdís Kolbrún Reykfjörð Gylfadóttir, ferðamála, iðnaðar og nýsköpunarráðherra, lagði á síðasta ríkisstjórnarfundi fram tillögu að gerð heildstæðrar nýsköpunarstefnu fyrir Ísland. Kveðið er á um mótun stefnunnar í stjórnarsáttmála ríkisstjórnarinnar og er hún nú formlega hafin. 

Þetta kemur fram á vef Stjórnarráðsins. Þar segir að nýsköpun og hvers konar hagnýting hugvits sé mikilvæg forenda fjölbreytts atvinnulífs, sterkrar samkeppnisstöðu, hagvaxtar og velferðar þjóða.

Í því ljósi hefst vinna við mótun heildstæðrar nýsköpunarstefnu fyrir Ísland til ársins 2030 og verður hún unnin í víðtæku samstarfi stjórnvalda, atvinnulífs og vísinda- og menntasamfélags.

„Fjórða iðnbyltingin er hafin og það er fyrirséð að á næstu árum mun stafræn tækni og sjálfvirkni umbylta atvinnugreinum, hagkerfi, velferð og menntun. Í þessu felast ómæld tækifæri til róttækra breytinga, framfara og aukinna lífsgæða. Að sama skapi  geta þær þjóðir sem ekki ná að hagnýta sér þessar breytingar átt á hættu að dragast verulega aftur úr,“ segir á vef Stjórnarráðsins.

Verkefnið mun byggja á starfi fimm faghópa sem fjalla um eftirfarandi málaflokka.

1. Nýsköpun í þágu þróunar atvinnulífsins, þ.m.t. matvælaframleiðslu, heilbrigðistækni og menntamála.
2. Skipulagning stuðningskerfis nýsköpunar, þ.m.t. styrkjakerfi rannsókna og þróunar og stuðningur við sprotafyrirtæki.
3. Nýsköpun í þágu umhverfisvænna lausna, þ.m.t. orku– og loftslagsmála.
4. Nýsköpun í opinberum rekstri og einföldun regluverks.
5. Nýsköpun í heilbrigðismálum og velferðarþjónustu.

Sérstök verkefnastjórn mun halda utan um stefnumótunarvinnuna og verður hún skipuð verkefnisstjórum verkefnanna fimm, auk formanns verkefnisstjórnar sem ráðherra nýsköpunarmála skipar.

Nánar má sjá um verkefnið hér.

• 1 blogg um fréttina

Bloggað um fréttina

• Geir Ágústsson: Ríkið komi sér úr veginum